Беларус Президенті 2010 жылы Қазақстанға сапар жасайды

ИНСК. Наурыздың 30-ы. ҚазАқпарат /Расул Бахамов/ - 2010 жылы Беларус Президентінің Қазақстанға сапары өтеді. Бұл туралы бүгін, наурыздың 30-ы күні ЕҚЫҰ Қазіргі төрағасы, ҚР Мемлекеттік хатшысы-сыртқы істер министрі Қанат Саудабаев мәлім етті.

ЕҚЫҰ-ның Минск кеңсесінің ұжымымен және саяси партиялардың өкілдерімен болған кездесуде Қ.Саудабаев, елдің Сыртқы істер министрі Сергей Мартыновпен болатын келіссөзде екіжақты қарым-қатынастың ауқымды проблемаларын талқыламақ екенін айтты. Келіссөздің күн тәртібіне сондай-ақ, Александр Лукашенконың Қазақстанға жоспарланған алдағы сапарымен байланысты мәселе де енгізіліп отыр.

Қ.Саудабаев өз сөзінде, екі елдің арасындағы қарым-қатынастың тарихи тамыры терең екенін және бүгінде сол қарым-қатынастың жаңа деңгейге көтеріліп отырғанын атап көрсетті. Екі ел Ресеймен қосылып, өзара терең ынтымақтастыққа негіз болатын Кеден одағын құрды.

Қ.Саудабаев, сондай-ақ, Қазақстан Республикасының Президенті Н.Назарбаевтың 2009 жылдың қараша айында Беларус еліне жасаған ресми сапарының Астана мен Минскінің арасындағы байланыстарды нығайтуға қосымша серпін беріп отырғанын еске салды.