Қарағандыда кәсіпкер жалған шот-фактуралар жазып берген
12:28, 26 Маусым 2023
қАРАҒАНДЫ. ҚазАқпарат - Қаржы мониторингі агенттігі Қарағанды облысы бойынша департаменті жұмыстарды нақты орындамай, қызмет көрсетпей және тауарларды тиеп-жөнелтпей шот-фактураларды жазып беру фактісі бойынша сотқа дейінгі іс жүргізуді аяқтады, деп хабарлайды ҚазАқпарат.
«Халық тұтынатын тауарларды сатумен айналысатын жеке кәсіп иесі өз атынан «ТехнологияГорМаш» және «ТД СнабСервис» ЖШС атына 2019 жылдың сәуірі мен 2020 жылдың қараша айы аралығында тау-кен-шахта жабдықтарына арналған қосалқы бөлшектерге шот-фактуралар жазғаны анықталды. Бірақ іс жүзінде бұл тауарлардың жеткізушілері болмаған.
Қылмыстық әрекеттердің нәтижесінде мемлекетке жалпы сомасы 109 млн теңгеге жуық ірі залал келтірілді», - деп жазды департаменттен.
Сот үкімімен кәсіпкер кінәлі деп танылып, оған коммерциялық ұйымдарда әкімшілік-өкімдік функциялармен байланысты лауазымдарды 5 жыл мерзімге атқару құқығынан айыра отырып, 3,5 жыл мерзімге шартты түрде бас бостандығынан айыру түріндегі жаза тағайындалды.