«Қайрат» — «Реал» матчына билеттердің бағасы жарияланды

АЛМАТЫ. KAZINFORM — «Қайрат» футбол клубы UEFA Чемпиондар лигасындағы Алматыда өтетін матчтарына билет сатылымы туралы ресми хабарлама жасады.

«Қайрат» — «Реал Мадрид» матчына билеттер сатылымы 23 қыркүйекте сағат 17:00–де басталады.

Ережеге сәйкес, бір адамға екі билеттен артық сатып алуға болмайды, билет алған кезде жеке куәлік немесе төлқұжат деректері көрсетілуі қажет. Деректер сатып алу кезінде де, стадионға кіргенде де мұқият тексеріледі.

Билеттерді Ticketon платформасында, FCKAIRAT.COM сайтында және Qairat Superapp қосымшасында сатып алуға болады.

Әрбір матчқа билеттің бағасы — 30 мыңнан 250 мың теңгеге дейін болады.

– Билеттердің бағасы УЕФА-мен келісілген және барлық ойынға бірыңғай болып белгіленген билеттің бағасы 30 000 теңгеден 250 000 теңгеге дейін болады. Баға саясаты турнир талаптарына және Чемпиондар лигасы матчтарын ұйымдастырудың халықаралық тәжірибесіне сәйкес келеді, — деп хабарлады «Қайрат» ФК.

Сонымен қатар, абонемент иелеріне өз орындарын алдын ала және тиімді бағаға сатып алатын мүмкіндік беріледі. Оларға сатылым басталғанға дейін алдын ала хабарласып, толық ақпарат беріледі.

Билеттердің бір бөлігі дәстүрлі түрде бекітілген әлеуметтік және клуб квоталары аясында бөлінеді. Олар «Қайрат» Академиясының және клуб филиалдарының бапкерлері мен тәрбиеленушілеріне, паралимпиадалық спорт түрлерінің спортшыларына, сондай-ақ клубтың қызметкерлері мен ардагерлеріне беріледі.

Айта кетейік, Алматының орталық стадионында Чемпиондар лигасы матчтарына дайындық жұмыстары қатаң кесте бойынша жүргізіліп жатыр. Спорт ғимараттары дирекциясы орталық стадион алдағы «Қайрат» — «Реал Мадрид» ойынына толық дайын болатынын мәлімдеді.