Қазақ қызы алғаш рет Солтүстік бұғазын жүзіп өтті
ОРАЛ. KAZINFORM – Батыс Қазақстан облысының тумасы Әнел Сытдықова Ирландия мен Шотландия арасындағы Солтүстік бұғазын жүзіп өткен алғашқы қазақстандық әйел атанды. Әнелдің өзі Instagram әлеуметтік желідегі парақшасында мәлім еткеніндей, ол аталмыш бұғазды 4 қыркүйек күні 16 сағат 36 минут 19 секундта бағындырды.
Отандасымыз Солтүстік бұғазын жүзіп өткен 185 адамның қатарына енді.
– Төрт адамның бәрі де мәреге жетті. Менімен бірге болған германиялық, Олимпиада чемпионы Андреас 8 сағатта жүзіп өтіп, рекорд орнатты. Ал аустралиялық Бренда 11 сағатта мәре сызығын кесті. Тағы бір аустралиялық Джон 15 сағатта жетті, - дейді Ә.Сытдықова.
Оның айтуынша, бапкері Сергей Ленивкин Мәскеуден келген. Ол түркиялық досымен бірге қолдаушы ретінде қайықта болған.
Солтүстік бұғазы – суы салқын, ағысы қатты, әлемдегі ең қиын марафондық қашықтықтардың бірі.
Триатлоннан Қазақстанның тұңғыш темір ханшайымы, бірінші айронмен (Ironman) және ультрамен (Ultraman) Әнел Сытдықова 2019 жылы қазақстандықтардан алғаш рет әйгілі Ла-Манш бұғазын (38 км) гидрокостюмсіз жүзіп өткен. Одан кейін 2022 жылы жазда АҚШ-та Манхэттен аралы айналасында 20 көпірді айналып, 48,5 км қашықтықты бағындырды. Содан кейін Лос-Анджелесте әлемдегі ең ұзақ марафондық қашықтықтардың бірі – Каталина бұғазын (34 шақырымға жуық) тоқтамастан жүзіп өтті.
Еске сала кетейік, бұдан бұрын Антарктида суларын алғаш рет жүзіп өткен қазақ қызы туралы не білетініміз жөнінде жазған едік.