Қырғызстанда Қорғаныс министрлігінің қызметкерлері жемқорлықпен ұсталды

БІШКЕК. KAZINFORM – Қырғызстанда Қорғаныс министрлігі шенеуніктері тарапынан ақша алудың сыбайлас жемқорлық схемасы анықталды, деп хабарлайды Kazinform меншікті тілшісі.

Қырғызстан Республикасы ҰҚМК мәліметінше, оқу батальоны командирінің жеке құраммен жұмыс жөніндегі орынбасары майор М.Б.М. мен оқу батальоны 2-ротасы 1 взводының командирі лейтенант К.А.Б. «Қой-Таш» әскери бөлімінде мобилизациялық резервке әскерге шақырылғандардан ақша өндірудің жүйелі схемасын ұйымдастырған.

Хабарланғандай, офицерлер 1 мыңнан 50 мың сомға дейінгі ақша үшін заңсыз қысқа мерзімді еңбек демалысы, бөлімшеден рұқсатсыз шығу мүмкіндігі, ұялы телефондарды пайдалану түріндегі жеңілдіктер қарастырған.

Қырғыз Республикасының Ұлттық қауіпсіздік мемлекеттік комитеті Қырғызстан Республикасы Қылмыстық кодексінің 342-бабы «Пара алу» бойынша қылмыстық іс қозғады. Аталған тұлғалар ұсталып, Қырғыз Республикасы ҰҚМК уақытша ұстау оқшаулағышына қамалды.

Тергеу амалдары жалғасып жатыр.

Бұған дейін Қырғызстанда Көлік министрінің бірінші орынбасары ұсталғанын хабарлаған болатынбыз.