ҚР Президентінің телерадиокешені Бельгия туралы деректі фильм түсіруде

БРЮССЕЛЬ. Сәуірдің 7-сі. ҚазАқпарат /Димаш Сыздықов/ - Елбасы Нұрсұлтан Назарбаевтың Бельгия Корольдігіне сапарының қарсаңында Қазақстан Президентінің телерадиокешені сол ел туралы деректі фильм түсіру үшін Брюссельге келді.

Кешеннің фильм түсіру басқармасының бастығы Гүлзада Қамарованың айтуынша, биыл Елбасының шетелдік сапарларының қорытындысы бойынша «Әлемге көзқарас» деген атаумен деректі фильмдер топтамасын жасау жоспарланып отыр. «Жақын арада біз Елбасының АҚШ-қа, Ұлыбританияға, Бельгия мен Оңтүстік Кореяға сапарлары бойынша фильмдер түсіруді жоспарлап отырмыз және ол фильмдер телерадиокешеннің «алтын қорына» кіретін болады», - дейді Г.Қамарова.

Фильмдерде Елбасы сапармен барған елдердің тарихы, мәдениеті, салт-дәстүрі туралы, сондай-ақ қарапайым азаматтар мен олардың біздің республикамызға деген көзқарастары туралы әңгімеленеді. «Біздің басты міндетіміз - көрермендерге Қазақстанның серіктестері туралы баяндау», дейді Г.Қамарова.

Республикалық телеарналардағы аталмыш деректі фильмдердің көрсетілімдері 2010 жылдың екінші жартысына жоспарланып отыр.