Мұнай бағасы соңғы жеті айда ең жоғары деңгейге жетті

АСТАНА. KAZINFORM — АҚШ пен Иран арасындағы шиеленістің күшеюіне байланысты мұнай бағасы өсті. Brent crude және West Texas Intermediate маркалы мұнай құны шамамен 1 пайызға қымбаттап, тиісінше барреліне 72,34 және 67 долларға жетті. Апта қорытындысы бойынша баға шамамен 6,5%-ға өсіп, соңғы жеті айдағы ең жоғары көрсеткішке көтерілді, деп жазды BILD агенттігі.

Бағаның өсуіне АҚШ президенті Дональд Трамптың Иранның ядролық бағдарламасына қатысты дауда Тегеранға қысымды күшейткен мәлімдемелері түрткі болды. Ол келісімге келу үшін он күндік мерзім берілгенін атап өткен.

Инвесторлар жағдай ушыға түссе, мұнай жеткізудің маңызды бағыттарының бірі саналатын Ормуз бұғазы арқылы кеме қатынасы бұзылуы мүмкін деп алаңдаулы.

Phillip Nova компаниясының сарапшысы Приянка Сачдева «қазір нарық жоғары деңгейдегі алаңдаушылық күйінде» екенін айтты.

Айта кетейік, әлемдік мұнай нарығы бұрын-соңды болмаған белгісіздік кезеңін бастан өткеріп жатыр. Бұл жағдай ең алдымен ұсыныс тарапындағы тәуекелдердің артуымен байланысты.