«Өзенмұнайгаз» бас директорының экс-орынбасары Қарамырзаев ұсталды
«Қаржылық мониторинг агенттігінің Маңғыстау облысы бойынша департаменті «Өзенмұнайгаз» АҚ бас директорының бұрынғы орынбасары Е. Қарамырзаевті (қазіргі таңда «Қаражанбасмұнай» АҚ бас директорының орынбасары) ұстады.
Ол «КЕЗБИ» ЖШС-нің және «Өзенмұнайгаз» АҚ-ның басқа да мердігер ұйымдарының заңды кәсіпкерлік қызметіне кедергі жасау мақсатында қызметтік өкілеттігін пайдаланды деп күдіктеліп отыр.
Қарамырзаев конкурстың жекелеген қатысушыларының біліктілік талаптарына сәйкес келмейтінін және мұнай-газ саласындағы жұмыс тәжірибесі туралы жалған құжаттар ұсынғанын біле тұра, оларды тендерге қатыстырған.
Олардың мүдделерін қолдауды жалғастыра отырып, ол «КЕЗБИ» ЖШС-ны ұңғымаларды жерасты жөндеу бойынша өзіне қолайсыз шарт жасасуға мәжбүр етті.
Өзінің заңсыз әрекеттерімен ол «КЕЗБИ» ЖШС-ның заңды мүдделеріне елеулі зиян келтірді және мыңнан астам қызметкердің құқықтарын бұзды, сондай-ақ мердігер ұйымдардың еңбек ұжымдарында әлеуметтік шиеленіс тудырды», - делінген хабарламада.
ҚР Қылмыстық-процессуалдық кодекстің 201-бабы негізінде өзге ақпарат жария етілмеді.
Еске салайық, биылғы 21 сәуірде «Өзенмұнайгаз» АҚ мен «БерАли Маңғыстау Company» ЖШС-да ұрлық фактілері бойынша тергеу жүріп жатқаны мәлім етілді.2 маусымда Маңғыстау облысы бойынша экономикалық тергеп-тексеру департаменті лауазымды өкiлеттiгін асыра пайдаланды деген күдікпен «Өзенмұнайгаз» АҚ бас директорының орынбасары Б.Мамбетсапаевты ұстады.
«Өзенмұнайгаздың» қаржы-шаруашылық қызметінде 160 заң бұзушылық анықталғаны жарияланды.
Ал 23 маусымда Ақтау қаласында Маңғыстау облысының Қоғамдық коммуникациялар орталығында брифинг өтіп, онда «ҚазМұнайГаз» ҰК АҚ-ның (ҚМГ) арнайы жұмыс тобы «Өзенмұнайгаз» АҚ (ӨМГ) және оның мердігер ұйымдарында жүргізген тексеру жұмыстарының қорытындысы жарияланды.