Талдықорғанда облыс әкімдігі мен «ҚазТрансГаз» АҚ арасында бас келісімге қол қойылды

ТАЛДЫҚОРҒАН. Наурыздың 3-і. Қазақпарат /Сандуғаш Дүйсенова/ - Бүгін Талдықорғанда облыс әкімі Серік Үмбетов пен «ҚазТрансГаз» АҚ бас директоры Серік Сұлтанғазиев Алматы облысын газдандыру бағдарламасын жүзеге асыру ауқымындағы ынтымақтастық пен өзара іс-қимыл туралы бас келісімге қол қойды.

С.Үмбетов мәлім еткеніндей, қазіргі уақытта Алматы облысын газдандыру деңгейі небәрі 5,7 пайызды құрайды, бұл республикадағы соңғы орындардың бірі. Осыған байланысты әкімдік «ҚазТрансГаз» АҚ-мен бірлесе отырып өңірді кең ауқымды газдандыру жұмысын жүргізуді жоспарлап отыр. Келісім нәтижесінде «Алматы-Байсерке-Талғар» газ құбырын салып, оны 2011 жылдан кешіктірмей пайдалануға беру, сөйтіп Іле және Талғар аудандарын 100 пайыз газдандыру; «Қазақстан-Қытай» магистральдық газ құбырынан Алматы облысының Жамбыл, Талғар, Еңбекшіқазақ, Ұйғыр және Панфилов аудандарына құбыр тармақтарын тартуды 2012 жылға дейін аяқтау, G-4 серіктес қаласына және Жаңа Іле ойын-сауық қаласына газ тарту; 2011 жылы «Іле ауданының 7 елді мекенін газдандыру» жобасын қаржыландыру сияқты және басқа да маңызды жобалар бар.