5,5 млн. жуық теңге бюджет қаржысын жымқырғаны үшін бас есепші жеті жылға сотталды - БҚО
БҚО прокуратурасының баспасөз қызметінен түскен мәліметке қарағанда, аталған дерек сотқа дейінгі тергеп-тексерудің бірыңғай тізіліміне ҚР ҚК 176-бабы 4-бөлімі «б» тармағымен (1997 жылғы редакцияда) тіркеліп, құжаттар ҚР Мемлекеттік қызмет істері және сыбайлас жемқорлыққа қарсы іс-қимыл агенттігі БҚО бойынша департаментіне жолданған болатын.
Сотқа дейінгі тергеп-тексеру барысында бас есепші З.Рахметованың 2013-2014 жылдары кәсіпорынның «Қазпошта» АҚ БҚО филиалы Сырым аудандық бөлімшесіндегі есепшотынан 5 490 534 теңгені алу жолымен иеленіп, ысырап еткені белгілі болды.
Сырым аудандық сотының үкімімен З.Рахметова 5 жыл мерзімге материалдық жауапты қызметті атқару құқығынан айырылумен бірге 7 жылға бас бостандығынан айырылды. З.Рахметованың тәрбиесінде үш жас баласының болуына байланысты негізгі жазаны орындау ҚР ҚК 74-бабына сәйкес 5 жыл мерзімге кейінге қалдырылды.
Сонымен қатар БҚО дене шынықтыру және спорт басқармасы мен аудан прокурорының З.Рахметовадан сәйкесінше басқарма пайдасына 5 490 534 теңге және мемлекет есебіне 201 980 теңге процессуалдық шығын өндіру туралы талап-арыздары қанағаттандырылды.