540 адамға жоғары мамандандырылған медициналық көмек көрсетілді - БҚО әкімі

 ОРАЛ. 5 желтоқсан. ҚазАқпарат - Биылғы жылдың он айында Батыс Қазақстан облыстық  клиникалық ауруханасында травматология, нейрохирургия, онкология, кардиохирургия және неврология бойынша 540 адамға жоғары мамандандырылған медициналық көмек  көрсетілді.

Облыс әкімі Нұрлан Ноғаевтың сөзіне қарағанда, Елбасы Жолдауына сәйкес 2011 жылы облыста көліктік медицина енгізілді. Флюорограф, стоматологиялық қондырғы, клиникалық және биохимиялық зертхана, УДЗ-диагностика жұмыс жасайтын жылжымалы медициналық кешеннің көмегімен шалғай ауылдық жерлер тұрғындарының медициналық көмекке қолжетімділігі қамтамасыз етілді.

Көліктік медицинаны дамыту шеңберінде республикалық бюджет есебінен 5 реанимобиль сатып алынды және жергілікті жерде шұғыл медициналық көмек көрсету үшін 5 көліктік-құтқару пункті ашылды.

Биыл 3  жылжымалы медициналық кешен облыстың 12 ауданына шығып жұмыс жасап, нәтижесінде 18 703 адам тексеруден өтіп, 9742 науқас анықталған  болса, 17038 адамға - кеңес, 15678 адамға - диагностикалық, 8937 адамға аурудың алдын алу қызметтері көрсетілген.