905 килә марихуанамен қолға түсті

ЖАМБЫЛ ОБЛЫСЫ. Тамыздың 11-і. ҚазАқпарат - «Дельта-Долина» арнайы бөлімшесінің жамбылдық полицейлері ҚР ҰҚК шекара қызметінің қызметкерлерімен бірлесе отырып, Алматы облысы Үшарал қаласында туылған есірткімен айналысушыны құрықтау бойынша операция өткізді, деп хабарлайды ІІД баспасөз қызметінен Роза Қалдыбекова.

Сақ қаскүнем Шу ауданының құмды алқабындағы «Бестам» жер телімінен 10 бау есірткі шөбін жинаған. Өнімнің жалпы салмағы 905 килә марихуананы құрады. Құқық қорғаушылар күдіктіні таңертең - ол шөп шауып жүрген сәтінде ұстады. Бұрын ұрлығы үшін сотты болған 38 жастағы күдікті марихуананы кептіріп, оңтүстік астанаға миллион теңгеге сатуды жоспарлағанын мойындады. Құрықтау кезінде бес қытай шатыры, орақ және ыдыс-аяқтар табылды.

Жамбыл облысы ІІД ЕБҚКБ бастығының орынбасары, полиция подполковнигі Жеңіс Бегмановтың айтуынша, «Көкнәр - 2010» операциясы басталғалы бері заңсыз айналымнан 6 тоннадай марихуана тәркіленіп, 90 есірткі қылмысы анықталған, оның ішінде есірткі сату дерегі - 20.

Бүгінде тұтқынға қатысты ҚР ҚК 269-бабының 2-бөлімінде көрсетілген есірткі затын заңсыз дайындау, сақтау, тасымалдау не сату бойынша қылмыстық іс қозғалды. Ол құрықталып, тергеу абақтысына жеткізілді. Күдіктіге мүлкін тәркілеумен 7 жылдан 15 жылға дейін бас бостандығынан айыру қаупі төніп тұр.