Ақмола облысы бойынша Мемлекеттік қызмет істері департаментінің басшысы тағайындалды

КӨКШЕТАУ. ҚазАқпарат - Мемлекеттік қызмет істері агенттігі Ақмола облысы бойынша департаментінің басшысы, Әдеп жөніндегі кеңес төрағасы лауазымына Думан Қайратұлы Әбілев тағайындалды, деп хабарлайды ҚазАқпарат тілшісі департаменттің баспасөз қызметіне сілтеме жасап.

Думан Қайратұлы Әбілев Қарағанды қаласындағы «Болашақ» институтын «Саясаттану» мамандығы бойынша, Қазтұтынуодағы Карағанды экономикалық университетін «Құқықтану» мамандығы бойынша бітірген.

Мемлекеттік қызметтегі жалпы еңбек өтілі 13 жылдан асады. Алғаш рет еңбек жолын 2008 жылы Қарағанды облысының ішкі саясат басқармасында жетекші маман болып бастаған. Агенттіктің жүйесінде 2011 жылдан бастап жұмыс істейді. Осы уақытқа дейін агенттіктің Қарағанды облысы бойынша департаментінің Тәртіптік кеңес қызметін қамтамасыз ету бөлімінің бас консультанты, одан әрі агенттіктің Мемлекеттік қызмет департаментінде басқарма басшысы, департамент директорының орынбасары лауазымдарын атқарады.

Жаңа қызметке тағайындалғанға дейін агенттіктің Мемлекеттік қызмет департаментінің директоры лауазымын атқарған.