Ақмола облысында 2009 жылдың қаңтар-қараша айында 13 387 адам жұмыспен қамтылды

КӨКШЕТАУ. Желтоқсанның 28-і. ҚазАқпарат /Жанмұрат Жанайдаров/-Ақмола облысы бойынша 2009 жылдың қаңтар-қараша айларында 19 063 адам жұмысқа тұруға өтініш білдірсе, олардың 13 мың 387-сінің талап-тілегі орындалған,

деп хабарлайды ҚазАқпарат тілшісі облыстық статистика басқармасының деректеріне селтеме жасап.

Ағымдағы жылдың қараша айының соңындағы деректерге сәйкес, еңбекпен қамту және әлеуметтік үйлестіру басқармасының құзырлы органдарында 5 257 адам жұмыссыздар қатарында есепке алынған, бұл өткен жылдың тиісті кезеңімен салыстырғанда 2 678-ге көп болса, жұмысқа орналастырылғандар үш есеге көп. Тек өткен айда 1 616 адам жұмысқа қабылданып, 208-і кәсіби шеберлігін жетілдіру және қайта даярлау курстарына,  106 адам қоғамдық жұмысқа тартылды. Аймақтар бойынша жұмысқа орналастыру жөнінде Ақкөл, Ерейментау, Есіл аудандарында бір мыңның үстінде, Атбасар мен Бурабайда -1800, ал Көкшетау мен Степногор қалаларында екі мыңнан сәл астам адам өтініш білдірген. Осы уақытта Атбасар ауданы мен Степногор қаласында  1500, Көкшетау қаласы мен Бурабай ауданында 1 200 адам жұмысқа қабылданған.