Ақтауда «Сен әскерге баруға дайынсың ба?» атты әскери-патриоттық акция өтті
Еліміздің өзге де өңірлерінде жалғасын тауып жатқан шара әскерге шақырылатын жастарға әскери-патриоттық тәрбие беру, Отан қорғауға, азаматтық борыштарын адал атқаруға шақырады.
Маңғыстау политехникалық колледжінің отызға жуық студенттері №25744 әскери бөлімінде болып, жауынгерлердің әскери дайындықтарын көрді.
«Біз мына әскери бөлімнен қару-жарақтарды бөлшектеп-жинауды, әскери сапқа тұруды үйрендік. Менің жасым 16-да. Мен алдағы уақытта осы әскери бөлімге келіп, Отан алдындағы борышымды өтеуге дайынмын», - дейді Маңғыстау политехникалық колледжінің студенті Әмірханов Ринат.
№25744 әскери бөлімі 1941 жылы 15 желтоқсанда құрылған. Осы бөлімнің аға офицері Нұрлан Қасымовтың айтуынша, қазір мұнда мыңға жуық сарбаздар бар. Болашақ сарбаздардың келесі легі сәуір айының 20-сынан бастап қабылданады. Әр облыстан шамамен барлығы 400-ге жуық сарбаз әскери қызметке шақырылмақ.