Ақтөбеде кісі өлтіргені үшін іздеуде болған ресейлік азамат ұсталды.

АҚТӨБЕ. 14 наурыз. ҚазАқпарат - Ақтөбеде «Іздеу» операциясы барысында кісі өлтіргені үшін бір жыл бойы іздестірілген ресейлік азамат ұсталды, деп хабарлайды ІІД-нің баспасөз қызметі.

Ер адам 2012 жылдың ақпан айында Орск каласында дүкенге қарақшылық шабуыл жасаған кезде күзетшіні өлтіріп, жасырынған. Кеше ол криминалдық полиция қызметкерлерімен ұсталды.

Облыс аумағында операцияны жүргізудің 2 күні ішінде жасырынып жүрген 22 қылмыскер, оның ішінде ауыр және аса ауыр қылмыс түрлерін жасағаны үшін - 12, сонымен бірге кісі өлтіргені үшін - 2 қылмыскер ұсталды, із-түссіз жоғалған 6 азамат ізделіп табылды.

Сондай-ақ ТМД елдері іздеу салған 3 қылмыскер, соның ішінде 1 кісі өлтіруші ұсталды.

«Іздеу» ТМД мемлекеттерінің ІІМ-тері арасында қол жеткізілген келісімге сәйкес наурыздың 12-нен 14-не дейін жүргізіледі.