Ақтөбеде ойын-сауық мекемелеріндегі түнгі тәртіпті «Бүркіт» тобы қадағалауға кірісті

АҚТӨБЕ. 19 сәуір. ҚазАқпарат - Ойын-сауық мекемелеріндегі қылмыстарға дер кезінде әрекет ету үшін Ақтөбе облыстық ІІД-де «Бүркіт» арнайы түнгі тобы құрылды.

Бұл туралы құзырлы органның баспасөз қызметінен хабарлады.

Оның құрамына әкімшілік полиция, жол полициясы басқармаларының қызметкерлері және жедел әрекет ету арнайы жасағының сарбаздары енген. Топ ойын-сауық орындары орналасқан аумақта кезекшілік атқарып, мекемелердің маңына тоқтаған көліктерді тексереді, қауіпсіздік шаралары бойынша келушілермен және әкімшілікпен түсіндіру жұмыстарын жүргізеді.

Аздаған уақыт ішінде «Бүркіт» тобы 3 травматикалық қаруды тәркілеп, 6 қылмысты әшкереледі. Әртүрлі әкімшілік құқықбұзушылықтар үшін 60 ақтөбелік жауапкершілікке тартылды.

Мәселен, «Бүркіт» түнгі тобы наурыз айында «Тропикаль» ойын-сауық мекемесі маңындағы аумақта қос жігіттен екі травматикалық қаруды тәркіледі.