Ақтөбеде тиым салынған әдіспен емдеген екі әйел қолға түсті

АҚТӨБЕ. 22 сәуір. ҚазАқпарат - Ақтөбе облыстық ІІД экстремизммен күрес басқармасының қызметкерлері жедел-іздестіру шараларының барысында коттедждің жертөлесінде дәстүрлі емес емдеумен айналысқан екі әйелді ұстады.

42 және 56 жастағы әйелдер халыққа 2008 жылы Алматы қалалық мамандандырылған сотының шешімімен тиым салынған «Алла-Аят» және «Фархат-ата» әдістерімен ем-дом жасаған.

Прокуратура дәрігерсымақ екі әйелге қатысты ҚР әкімшілік құқықбұзушылықтар туралы кодексінің 374 бабына сәйкес әкімшілік іс қозғалды.

Аталмыш заңбұзушылық үшін жүз айлық есептік көрсеткіш мөлшерінде айыппұл қарастырылған.