Әлихан Смайылов Сыртқы істер министрлігінің ұжымына жаңа басшыны таныстырды

АСТАНА. ҚазАқпарат – Министрлер кабинетінің басшысы Әлихан Смайылов Сыртқы істер министрлігінің ұжымына жаңа басшы – Премьер-Министрдің орынбасары – сыртқы істер министрі Мұрат Нұртілеуді таныстырды. ҚазАқпарат бұл туралы Үкімет басшысының баспасөз қызметіне сілтеме жасап хабарлайды.

Әлихан Смайылов қазіргі геосаяси ахуал кезінде сыртқы саяси ведомство жұмысының маңызы артқанын атап өтті. Дипломатиялық шешімдер арқылы ҚР СІМ жақын және алыс шет елдермен өзара тиімді қарым-қатынастарды нығайтуға және ұлттық экономиканы дамытуға елеулі үлес қосып отыр.
«СІМ жұмысының нәтижесі бәрімізге тікелей әсер етеді. Президент ведомство алдына маңызды мақсаттар қойды, ұжымға оларға қол жеткізуде табыс тілеймін», — деді Үкімет басшысы.

Премьер-Министр жауапты басшылық лауазымдарда мол тәжірибесі бар Мұрат Нұртілеу Мемлекет басшысы қойған міндеттердің орындалуын қамтамасыз ететініне сенім білдірді.