Алматыда балабақшада қаза болған 5 жасар бүлдіршіннің ата-анасы мен сотталушы келіншек ымыраға келуі мүмкін

АЛМАТЫ. ҚазАқпарат - Бүгін Алматыда Әуезов аудандық сотында №58 балабақшада болған жол апатына байланысты сот отырысы басталды. Сотталушы Тайота Лэнд Крузер жүргізушісі 46 жасар Татьяна Семченконың ісі қаралды. Отырыс барысында белгілі болғандай, қос тарап келісімге келуі мүмкін. Бұл туралы мемлекеттік айыптаушы Гүлмира Сейтқазиева айтты.

«Жәбірленуші тараптың арыз-шағымдары қайтарылып, тоқтатылды. Егер іс барысында қосымша арыздар түсетін болса қаралады. Марқұм қыздың әкесі Бақытжан Молдабаев пен Ербол Төлепов, Серік Сәрсеновтер айыпталушыдан ештеңе талап етпейді», - деді прокурор.

Сот барысында айыпталушы өз кінәсін толығымен мойындады.

«Мен өз кінәмді толық мойындаймын. Әділ сот мейірімділік танытуыңызды сұраймын. Ауызша түрде осы кінәмді мойындаған арыз-шағымымды бердім», - деді Т.Семченко.

Сондай-ақ, сот отырысы барысында Семченко ханымның онкологиялық есепте тұрғаны белгілі болды.

«Кінәлі азаматшаның онко-диспансерде тұрғанын қылмыстық істе қарауыңызды сұраймын», - деді мемлекеттік айыптаушы.

Заң мамандарының айтуынша, ол өз кінәсін толық мойындауына байланысты Қылмыстық Кодекстің 345-бабы, 3-бөліміне сәйкес 5 жылға дейін бас бостандығынан айырылуы мүмкін. Соттың ақырғы шешімі 10 тамыз күні шығады.

Айта кетейік, төтенше жағдай 20 мамырда болған еді. Тайота Лэнд Крузер көлігі №58 балабақшаның шарбағына соғылып, аула ішіндегі үйшікті қиратқан болатын. Сол сәтте алаңда ойнап жүрген 5 жастағы балдырған қыз көз жұмды, сегіз бүлдіршін ауруханаға жеткізілді, олардың екеуі жан сақтау бөліміне түсті.