Алматыда Қазақстан-Иран іскерлік кеңесінің алғашқы отырысы өтті
Иран Ислам Республикасы бизнес өкілдерінің Қазақстанға сапары аясында өткен кездесу барысында екіжақты бизнестің өзекті мәселелері мен дамыту жолдары талқыланып, іскерлік байланыс орнатуға жол ашылды. Иранның Қазақстандағы Төтенше және Өкілетті елшісі Горбан Сейфидің айтуынша, Қазақстан мен Иранның экономиканың түрлі салаларындағы байланысы жоғары деңгейде дамуда. «Біздің халықаралық деңгейдегі ықпалдастығымыз да қалыпты деңгейде, тараптардың қызығушылығына лайықты жауап береді. Біздің мемлекеттеріміз арасында түрлі саларда әріптестік орнатуға үлкен мүмкіндіктер бар. Әріптестіктегі ең басты сала бұл экономика. Алдағы уақытта біз ауылшаруашылығы, білім, инженерлік-техникалық салаларды, байланысты дамытуға мүмкіншілігіміз бар», деді Иран елшісі. Ол сондай-ақ формалды іскерлік кеңес құруды көздейтіндерін жеткізді. «Меніңше, бұндай кеңес екіжақты қарым-қатынасты дамытудағы кедергілерді жоюға ықпал жасайды. Кеңестің басты мақсаты - екі жақтың мүмкіндіктерін кеңірек таныстыру», деді Горбан Сейфи.