Атырауда елді мекендердің бас жоспары жасақталады
Жиырма сегіз адамнан құрылған жаңа кеңестің құрамын облыстық сәулет және қала құрылысы басқармасының басшысы Төлеп Орынбасаров таныстырып, кеңес мүшелерін белсенді жұмыс жасауға шақырды.
«Бас жоспарсыз кез келген құрылысқа жер бөлуге еш құқығымыз жоқ екенін білесіздер. Жуырда ҚР Өңірлік даму министрлігінде облысымыз аудандарда бас жоспар болмағандықтан, сынға алынған болатын. Қазір тек аудандарда ғана емес, қалада да жоспарлау жұмыстары жүргізіліп жатыр», - деді кеңес төрағасы Атырау облысы әкімінің орынбасары Тимуржан Шәкімов.
Облыстық сәулет және қала құрылысы басқармасының басшысы Төлеп Орынбасаровтың айтуынша, бүгінгі күні 8 мыңнан астам тұрғыны бар Атырау қаласы, Индербор, Доссор, Мақат елді мекендері бас жоспармен қамтылған. Облыс орталығының бас жоспары 2002 жылы бекітілсе, қалған үш аймақтың бас жоспарлары 2009 жылы жасақталды. Жобалаушы мекеме - Алматы қаласының «Казгипроград 1» жобалау институты» жауапкершілігі шектеулі серіктестігі.
Ағымдағы жылы бес аудан орталығы, атап айтсақ, Құлсары қаласы, Махамбет, Аққыстау, Ганюшкин, Миялы селоларының бас жоспарын жасақтауға жергілікті бюджеттен қажетті қаржы бөлініп, жұмыстар кестеге сай жүргізілуде. Айта кетсек, аталған елді мекендердің бас жоспары бұрын болмаған. Тек осыдан 33 жыл бұрын даму жобалау схемасы жасақталып, әлдеқашан маңыздылығын жойған.
Аталған елді мекендердің бас жоспарын жасақтауға жарияланған қонкурсты жеңіп алған алматылық жобалау институтының директоры Валентина Баркованың айтуынша, Құлсары қаласы, Миялы, Махамбет, Ганюшкин, Аққыстау селоларының ұзақ мерзімді даму болжамын (тұжырымдамасын) дайындау барысында «жасыл экономика» жобасын жүзеге асыруға баса көңіл бөлінген. Сонымен қатар, Атырау облысы ауыл шаруашылығын дамытуға болатын бірден-бір қолайлы аймақ болып табылатындығын баса айтты.
Валентина Баркова кеңес мүшелерін аталған елді мекендердің тұжырымдамасымен толықтай таныстырып, сұрақтарға тұшымды жауап берді.