Батыс Қазақстанда жұмыспен қамтудың аймақтық бағдарламасына сәйкес - 3886, «Жол картасы» аясында 5083 жұмыс орны ашылды

ОРАЛ. Тамыздың 19-ы. ҚазАқпарат /Елжан Ералы/ - БҚО-да облыс халқын жұмыспен қамтудың 2008-2010 жылдарға арналған аймақтық бағдарламасына сәйкес биыл 6115 жұмыс орнын ашу көзделсе, жеті айда соның 3886-сы орындалып отыр,

деп хабарлайды ҚазАқпарат тілшісі облыс әкімдігінен түскен мәліметке сілтеме жасап.

Соның ішінде 2307-сі немесе 59,4 пайызы ауылдық жерде ашылды. Бұдан басқа «Жол картасының» инвестициялық бағыттары бойынша 5083 жұмыс орны пайда болды.

Жыл басынан бері өңірде 12250 адам жұмысқа орналасса, соның 9854-і жұмыспен қамту орталықтары арқылы жолданып, «Жол картасы» арқылы 3053 адам жұмыс тапты. 1773 адам әлеуметтік жұмыс орнына, 981-і жастар тәжірибесіне жіберілді. Шағын бизнеске 2396 адам орналасты.

Жұмыспен қамту бағдарламасында көзделген 1088-дің орнына жұмыссыздарды өндірісте одан әрі бекіту үшін 717 әлеуметтік жұмыс орны ашылды. Ақылы қоғамдық жұмыстарға 4776 адам (бағдарламада көзделгеннің 69,9 пайызы) жіберілді.

Тамыздың 1-індегі есеп бойынша кедей отбасылар саны 2231-ді құрап, былтырғыдан 817-ге азайды.