Батыс Қазақстанда жыл басынан 1538 жаңа ғимарат пайдалануға берілді

ОРАЛ. 25 қазан. ҚазАқпарат - Батыс Қазақстан облысында биылғы тоғыз айда 35,8 млрд. теңгенің құрылыс жұмыстары орындалды.

Облыстық статистика департаментінен түскен мәліметке қарағанда, жыл басынан бері 1538 жаңа ғимарат пайдалануға берілді.

Тоғыз айда тұрғын үй құрылысына 8,7 млрд. теңге жұмсалды. Жалпы ауданы 164,5 мың шаршы метр тұрғын үй бой көтерді, бұл өткен жылғыдан 13,5 пайызға көп. Соның ішінде 146,5 мың шаршы метр тұрғын үй жұртшылық қаражатына, 16,7 мың шаршы метр үй республикалық бюджет есебінен (1,4 мың шаршы метр - коммуналдық, 15,3 мың шаршы метр несиелік тұрғын үй), 1,3 мың шаршы метр жатақхана кәсіпорын қаржысына салынған.