«Байқоңыр» ғарыш айлағында алдағы сапарларға дайындық жүруде

ҚОҢЫР.   Қазанның  29-ы.  ҚазАқпарат /Сара Қабиқызы/ -  «Байқоңыр» ғарыш  айлағында  2009 жылдың  соңына  дейін    болатын  ұшыру сапарларына дайындық  жүріп  жатыр.

 «Ресейғарыш» агенттігінің баспасөз қызметінен   хабарлағандай,  ғарыш айлағының 31-ші алаңындағы   құрастыру-сынақтан өткізу  корпусында Intelsat-15   американдық  телекоммуникациялық  ғарыш  аппаратымен жұмыстар  басталды.

 Шетелдік мамандар,  «Южный»   ғарыш  орталығының  қызметкерлерінің  қолдауымен Intelsat-15   ғарыш аппаратының автономиялық сынағына кірісті.

 Intelsat-15  ғарыш аппаратын   орбитаға алып шығатын  «Зенит-2SБ»  ғарыш  кемесін  ұшыру  ұшу сапары     қараша  айының соңына   жоспарланған. 

 «Ресейғарыш» мамандары сондай-ақ  құрастыру-сынақтан    өткізу корпусының  254-ші алаңында «Союз ТМА-17»   ғарыш  кемесінің  жүйелерін  автономиялық  тексеруге кірісті.  «Союз ТМА-17»  кемесі    кезекті    экспедициямен    Халықаралық ғарыш стансысына  2009 жылы желтоқсан айының соңында аттанады.