Бельгиялық Стейн қазақ тілін 7 жыл үйреніп, Сырым атанды

АСТАНА. KAZINFORM – Бельгиялық студент Стейн Ромбоут, қазақша есімі — Сырым, жеті жыл бойы интернет арқылы қазақ тілін өз бетінше үйреніп, Қазақстанда білім алып жүр. Қазір ол Алматыдағы Абылай хан атындағы Қазақ халықаралық қатынастар және әлем тілдері университетінде аударма ісі мамандығы бойынша оқып жатыр және Jibek Joly телеарнасындағы «Bugin Live» бағдарламасына арнайы сұхбат берді.

Сырым алғаш рет Қазақстанға 2018 жылы келген. Алматы, Шымкент, Түркістан қалаларын аралап, қазақ мәдениеті мен халқына деген ерекше ықылас сезінгенін айтады. Сол сапардан кейін қазақ халқына, оның қонақжай мінезі мен ұлттық тағамдарына ғашық болған.

– Қазақ тілін интернеттегі түрлі ресурстар арқылы үйрендім. Грамматиканы кітаптардан оқып, адамдармен сөйлесу арқылы тілді дамыттым. Арнайы курсқа бармадым, барлығын өз күшіммен меңгердім, – дейді ол.

Сырым қазақ тілінен бөлек голланд, ағылшын, қытай тілдерін жетік меңгерген. Жалпы алғанда, 6-7 тілді әртүрлі деңгейде біледі. Қазақша есім ретінде Сырым есімін таңдауының да өзіндік себебі бар.

– Сырым Датұлы туралы білген соң, осы есімді таңдадым. Оның мағынасы да, тарихы да ұнайды, – дейді бельгиялық студент.

Қазақ тіліндегі кейбір сөздер де Сырымның ерекше ықыласына ие болған. Мәселен оны «айналайын», «уәждеме» және «мәссаған» сөздерінің айтылуы қызықтырады.

Сонымен бірге, қазақ тілін үйренудегі негізгі қиындықтардың бірі – ресурстар тапшылығы болған. Шетелдік студент тіл деңгейі жоғарылаған сайын қажетті материалдардың аздығы байқалғанын айтады.

Алдағы жоспарларына тоқтала келе, Сырым Қазақстанда қалу-қалмауы жұмыс табуына байланысты екенін жеткізді.

– Егер жақсы жұмыс таба алсам, Қазақстанда қалуым мүмкін. Мұндағы өмір ұнайды: табиғаты әдемі, халқы қонақжай, ауасы таза, тағамдары дәмді, – деп бөлісті Сырым.

Айта кетейік, қараша айында қазақ тілін үйрететін ЖИ-агент іске қосылады.