Біз дамыған елдердің шаңын жұтуға емес, көшін бастауға ұмтылған елміз - Н.Назарбаев

АСТАНА. ҚазАқпарат - Біз дамыған елдердің шаңын жұтуға емес, көшін бастауға ұмтылған елміз. Бұл туралы бүгін Елордадағы Бейбітшілік және келісім сарайында Қазақстан халқы Ассамблеясының «Қазақстан-2050: бейбітшілік, руханият және келісім мәдениеті» атты күн тәртібімен өтіп жатқан ХХІ сессиясында ҚР Президенті Нұрсұлтан Назарбаев айтты.

«Ұлттық мүдде тұрғысынан мұқият ойластырған интеграцияға қарсы болу заманауи үрдіс пен дамуға қарсы болу болып табылады. Ең дамыған елдердің барлығы бүгінде интеграцияға көшуде. Бүкіл адамзат жаһандану жолымен дамып жатыр», - деді Елбасы.

Мемлекет басшысының атап өтуінше, етек-жеңді қымтап, есік-терезені тарс жауып отыру дамуды тежейді, әлем көшінің соңында қалдырады. «Біз дамыған елдердің шаңын жұтуға емес, көшін бастауға ұмтылған елміз. Байбаламға салып, балақтан тартпай, байыппен ойлап, байсалды әрекет етсек жарасады», - деді Н.Назарбаев.