БҚО-да 43,4 мың гектар жердің игерілмегені анықталды
Оның айтуынша, 35-қадамда «Ауыл шаруашылығы жерлерін тиімді пайдалану мақсатымен оларды нақты айналымға енгізу, Жер кодексіне және басқа да заң актілеріне өзгерістер енгізу» жөнінде айтылса, 36-қадамда «Жер телімдерін мақсатты пайдалану түрін өзгертуге рұқсат алу ресімдерін жеңілдету. Ауыл шаруашылығы жерлерін пайдалануға тұрақты түрде мониторинг жүргізу. Барлық пайдаланылмай жатқан жерді алдағы уақытта жекешелендіру үшін мемлекеттік қорға беру сөз болады. Бұл қадамдар облыстық жердің пайдаланылуы мен қорғалуын бақылау басқармасына тікелей қатысты.
Басқарма ҚР Жер кодексін, «Қазақстан Республикасындағы мемлекеттік бақылау және қадағалау туралы» Заңын басшылыққа алып, өңірдің барлық аудандары мен қала аумағындағы ауыл шаруашылығы мақсатындағы жерлер бойынша жердің пайдаланылуы мен қорғалуына мемлекеттік бақылауды жүргізуде. Таяуда, яғни 10 тамызда жалпы көлемі 48,0 мың гектар ауыл шаруашылығы мақсатындағы егістік, жайылымдық және шабындық жерлерге тексеру жұмысы жүргізілді. Нәтижесінде 95 шаруашылықтың жалпы көлемі 43,4 мың гектар жерді игермегендігі анықталды. Мәселен, Зеленов ауданында 10,7 мың, Қазталовта 7,6 мың, Тасқалада 7,2 мың, Жәнібекте 4,6 мың, Жаңақалада 3,8 мың, Бөкей ордасында 3,1 мың, Бөрліде 2,4 мың және Орал қаласында 1,7 мың гектар жер игерілмеген. Оларға жер заңнамасына сәйкес тиісті нұсқамалар берілді.
Басқарма Зеленов ауданындағы 8 шаруашылықтың 6,6 мың, Тасқаладағы 3 шаруашылықтың 1,0 мың, Қазталовтағы 18 шаруашылықтың 9,3 мың және Орал қаласындағы 3 шаруашылықтың 1,0 мың гектар көлеміндегі ауыл шаруашылығы жерлеріне қатысты құжаттарына сараптама жасады. Сондай-ақ алдын ала далалық тексеріске шығу жұмысын жоспарлап, әрі қарай тұрақты түрде тексеру амалдарын жалғастыру бағытында жұмыстанатын болады. Басқарма «Пайдаланылмай жатырған ауыл шаруашылығы мақсатындағы жерлерге белгіленген жер салығының мөлшерлемесін жергілікті атқарушы органдардың ұсыныстары негізінде он еседен асырмай жоғарылатуға құқығы бар» деп көрсетілген ҚР Салық кодексінің 387-бабының 1-1-тармағы бойынша және осы нормаларды жергілікті жерде қолдану жөнінде барлық аудан және қала әкімдерімен бірлесіп жұмыс жүргізуде. Бұдан басқа ҚР Жер кодексінің 65-бабында белгіленген міндеттерді орындамаған ауыл шаруашылығы тауар өндірушілердің жерлерінің жалдау шарттарын мезгілден бұрын бұзу бойынша шара қолдану бағытында жергілікті атқарушы және уәкілетті органдармен тиісті іс-шараларды атқаруда.
Айта кетейік, өңірдегі түгендеу, тексеру жұмыстары нәтижесінде анықталған пайдаланылмай жатырған жерлер бойынша жер телімін жалдау шарттарын бұзу және мәжбүрлеп алып қою жұмыстарын жүргізу арқылы жалпы көлемі 442,1 мың гектар ауыл шаруашылығы алқаптары мемлекет меншігіне қайтарылды.