Боксшы Ілияс Сүлейменов: Қарсыласым қолайсыз әрі аса биік болды

АСТАНА. 31 шілде. ҚазАқпарат - Лондондағы Олимпиадада швед спортшысы Саломо Нтувені жеңген қазақстандық боксшы Ілияс Сүлейменов өзінің алғашқы жекпе-жегі туралы айтып берді,

деп хабарлады Vesti.kz . сайтының тілшісі.

52 келіге дейінгі салмақ дәрежесінде жұдырықтасқан қазақстандық боксшы шведті 13:8 есебімен жеңді.

«Аздап шаршадым, бірінші жекпе-жек ауыр тиді. Қарсыласым ыңғайсыз әрі менен әлдеқайда ұзын болды, бұл жағдайды жеңілдеткен жоқ. Дегенмен біз бұл жекпе-жекке дайындалдық, жеңіске жеткеніме қатты қуаныштымын», - деп ағынан ақтарылған спортшының сөзін  келтірді Астана қаласының Туризм, дене шынықтыру және спорт басқармасының баспасөз қызметі.

 «Менің келесі қарсыласым да осал емес, енді сол жекпе-жекке дайындаламын», - деді ол.

3 тамызда өтетін жекпе-жектің 1/8 финалында І. Сүлейменов британдық спортшы Эндрю Селбимен кездеседі.