Брюссельде Қазақстанның ЕҚЫҰ-ға төрағалығы аясындағы экономикалық мүмкіндіктерді талқылауға арналған «дөңгелек үстел» отырысы өтті
Бұл басқосуға Еуропалық одақ институттары мен Бельгия бизнес-топтарының өкілдері, оның ішінде экспортты және инвестицияларды дамытумен айналысатын AWEX және аймақтық агенттіктердің өкілдері қатысты.
Қазақстанның Еуроодақ, НАТО ұйымдарының жанындағы, Бельгия және Люксембургтегі Елшісі Ерік Өтембаев жиналған қауымға «Еуропаға жол» мемлекеттік бағдарламасының негізгі бағыттарын, Қазақстанның алдағы ЕҚЫҰ-ға төрағалығының басты міндеттерін таныстырды және еліміздегі әлеуметтік-экономикалық және саяси реформалар туралы әңгімелеп берді.
Еуроодақтың Орталық Азия бойынша арнайы өкілі Пьер Морель өз сөзінде, Еуроодақтың Орталық Азия елдеріне қатысты стратегиясы мен «Еуропаға жол» мемлекеттік бағдарламасының бірін-бірін толықтырып отырғанын атап көрсетті. Ол сондай-ақ, Еуроодақтың аймақтағы негізгі серіктесі ретіндегі Қазақстанмен арадағы ынтымақтастығының мол әлеуетіне тоқталып, біздің еліміздің аймақтағы көшбасшы екенін баса атап көрсетті.
Ал Еурокомиссия өкілі Николаас Беинема өз сөзінде, жаһандық дағдарыстан шығу мәселесіне қатысты Президент Н.Назарбаевтың «Бесінші жол» мақаласындағы идеяларды жоғары бағалады.
«Дөңгелек үстел» отырысын қорытындылай келе, оған қатысушылар екі елдің үлкен компаниялары мен институттары кіре алатын қазақстан-бельгия бизнес-қоғамдастығын құру идеясын қолдады.