Бүгін ел тұрғындары Орионидтер метеорлық жауынын тамашалай алады

АСТАНА. ҚазАқпарат - Бүгін байқалатын Орионидтер метеорлық жауынының адамдарға зияны жоқ. Бұл туралы «ҚазАқпарат» тілшісіне берген сұхбатында Ұлттық ғарыштық зерттеулер мен технологиялар орталығы «В.Г. Фесенков атындағы астрофизикалық институт» ЖШС Ай және планеталар физикасы зертханасының меңгерушісі Виктор Тейфель мәлім етті.

«Денсаулыққа бұл метеорлардың әсері жоқ, сондықтан бұл тұрғыда зиян келеді деп алаңдап керек емес. Бұл бөлшектар 100-150 шақырым биіктікте жанып кетеді және олардың Жерге еш әсері болмайды. Тек қана осы метеорлық ағымнан Жердің салмағы біртіндеп өседі», - дейді профессор.

Оның сөзіне қарағанда, егер де Жер  шағын бөлшектер шоғырланған орбитаның тиісті бөлігін кесіп өткен кезде, бұл қатқыл бөлшектер үлкен жылдамдықпен Жер атмосферасына кіреді және ауаның кедергісінен жоғары биіктікте ыдырайды.

«Осы тұрғыда аспанда аққан жұлдыздар секілді жарықты байқаймыз. Метеорлар жауынын түннің орта кезінде әлемнің кез келген нүктесінде ашық кеңістікте көруге болады. Алайда, жарық шамдары көп жерлерде мұндай құбылысты байқау қиындау», - деді Виктор Тейфель.

Орионидтер - ол жыл сайынғы метеорлық жауын, яғни бұл ретте аққан жұлдыздар іспеттес көріністі байқауға болады. Метеорлық ағым кезінде аспаннан түрлі түсті жарықтар анық көрінеді. Ғалымдардың айтуынша, орионидтер 17-26 қазан аралығында белсенді болады, ал оның кең шоғыры 21 қазанда байқалады. Осы кезде құлаған метеорлардың саны сағатына орташа есеппен 20-ға дейін, ал кейде 30 метеорға дейін жетеді. Метеорлардың жылдамдығы секундына 66 шақырымды құрайды.