БҰҰ: Академик Нұралы Бектұрғанов жаңа технологияларды дамытудың қазақстандық перспективалары туралы әңгімелеп берді
Осынау шараның аясында ресейлік және қазақстандық жетекші зерттеушілер 2050 жылға дейінгі кезеңдегі өркениеттер дамуының жаһандық болжамын және осынау бірлескен қазақстан-ресей зерттеулеріне негіз болған Қазақстан Президенті Нұрсұлтан Назарбаевтың «Жаһандық қоғамдастықты түбегейлі жаңарту стратегиясы және өркениеттер серіктестігі» кітабын таныстырды.
«Парасат» Ұлттық ғылыми-технологиялық холдингі басқармасының төрағасы, ҚР Ұлттық Ғылым академиясының академигі Нұралы Бектұрғанов өз сөзінде, Елбасы кітабының негізгі тезистеріне тоқталды. «Жаһандық қоғамдастық үлкен сілкіністердің алдында тұр және жүйелі жауап үшін барлық мемлекеттер мен өркениеттердің күш-жігерін біріктіруге күш салу керек», деді ғалым кітап авторының ұстанымын таныстырып. Осы бағытта жасалып отырған негізгі қадамдар - жаңа технологияларды дамыту және кейінгі саяси іс-қимылдар.
Нұралы Бектұрғанов, сондай-ақ, негізгі қызметі ғылыми және технологиялық жобаларға жағдай жасау, оларды жинақтау және коммерциялық негізде жүзеге асыруға бағыттау болып табылатын «Парасат» ғылыми-технологиялық холдингі туралы әңгімелеп берді. Көптеген зерттеулер ресейлік мамандармен ынтымақтастықта, оның ішінде Жоғары технологиялардың халықаралық орталығы аясында жүзеге асырылуда. Атап айтқанда, екі елдің ғалымдары күн батареяларының тиімділігін 32 пайызға арттыруға қол жеткізіп отыр. Оған қоса, ғалымның пікірінше, Қазақстанда кремний технологиясы да дамып келеді.