Допты хоккей: Краснотурьинскіде «Маякты» ұтқан «Ақжайық» бірінші орынға көтерілді
Ресей допты хоккей федерациясының сайтынан алынған мәліметке қарағанда, бұл жолы да матч аса тартысты өрбіді. Бірінші тайм 2:2 есебімен тең аяқталса, ойынның екінші кезеңінде айдын иелері алға шықты. Бірақ қанша қиын болғанмен (бұл жолы да ойыншылары әлсін-әлсін айдыннан қуылған «Ақжайықтың» айып уақыты кешегіден асып түсіп, 75 минутқа жетті), Дмитрий Иванниковтің шәкірттері жеңіске деген күш-жігерлерін таныта білді. Сөйтіп 6:5 есебімен қарсыласын тізе бүктірген оралдық команда маңызды үш ұпайды иеленді. Бұл жолы ресейлік легионер Сергей Башаев қос доптың авторы атанса, тағы бір ресейлік Максим Пьянов, сондай-ақ Орал хоккейінің өз түлектері Ескендір Нұғманов, Павел Чебаков және Еламан Әліпқалиев «Маяктың» кақпасына бір-бірден гол соқты.
Алты ойыннан кейін 12 ұпай жинаған «Ақжайық» өз тобында қайтадан бірінші орынға көтерілсе, төрт кездесуден 9 ұпайды еншілеген «Маяк» екінші сатыда келеді.
Батысқазақстандықтар келесі ойындарын 12-13 желтоқсанда өз айдынында Екатеринбургтің «СКА-Свердловск» командасымен шеберлік байқасады.
Айта кетейік, «Ақжайық» командасы биылғы маусымда екінші топта алдыңғы орындардың бірін иеленіп, финалдық ойындарға шығуды мақсат етіп отыр.