Екі Toyota Land-Cruiser көлігі өртеніп, денесінің жартысын күйік шалған үш адам ауруханаға жеткізілді - Жамбыл облысы

ТАРАЗ. ҚазАқпарат - Шу ауданында көлік гаражы отқа оранып, үш адам зардап шекті, деп хабарлады Жамбыл облыстық ТЖД баспасөз қызметінен.

«19 маусымда Шу ауданы Бірлік ауылында «Темір жол» ЖШС гаражында екі «Toyota Land-Cruiser» көлігі өртенді», - делінген ведомство хабарламасында.

- От бір жарым сағат ішінде сөндірілді. Жалын 50 шаршы метр аумақты шарпыды. Өрт салдарынан 38, 34 және 26 жастағы үш азаматтың денесін 50 пайыз, 2-3 дәрежелі күйік шалып, олар Шу қалалық ауруханасына жеткізілді».

Отты ауыздықтауға облыстық ТЖД «Өрт сөндіру және апаттық-құтқару жұмыстары қызметі» ММ 7 құтқарушысы мен 2 техникасы тартылды.

Өрт себептері мен материалдық шығын анықталып жатыр.