Елбасы туралы солтүстікқазақстандықтардың пікірін топтастырған көлемді жинақ жарық көрді
Кітапта мемлекет және қоғам қайраткерлері, ақын-жазушылар, кәсіпкерлер де Елбасының мемлекетіміз сіңірген еңбегі, солтүстік өңірге барғандағы кездесулерден алған әсерлері туралы жазған. Солтүстік Қазақстан облысының әкімі Серік Біләлов, Мемлекет және қоғам қайраткерлері Бәйкен Әшімов, Мақтай Сағдиев, Кәкімбек Салықов, соғыс және еңбек ардагері Сапар Дүйсенов, ҚР Парламенті Мәжілісінің депутаты Жарасбай Сүлейменов және басқа көптеген азаматтар Тұңғыш Президенттің мемлекетті басқарудағы көреген қасиеттері, елді дамытудағы еңбегі жайлы ой толғайды.
Сонымен қатар аталған кітапта көп балалы ана да, оқушы да, әр саланың мамандары да пікір білдірген. Әр түрлі ұлттардың өкілдері де сөз алып, Қазақстандағы татулық, бірлік, келісім жайлы ойларын ортаға салған. Жалпы алғанда, Солтүстік Қазақстан облысындағы игі істер, оң өзгерістер қамтылған. Елбасының солтүстік өңіріне барғандағы кездесулерден түсірілген фотосуреттер де берілген.
Бүгінгі таңда бүкіл әлем Қазақ елінің басшысы Н.Ә.Назарбаевты жаңа мемлекет жасау жолындағы қиыншылықтарды жеңуде мұқалмас жігер, қажымас қайрат танытып, тарихтың да, тағдырдың да сынынан абыроймен өткен, халқын, елін ғасырлар төріне өрлеткен ұлы тұлға деп біледі. Елбасының кемеңгерлігіне, алыс болашақты болжай алатын көрегендігіне, білімі мен біліктілігіне солтүстікқазақстандықтар да тәнті. Осы кітапқа топтастырылған материалдардың тобықтай түйіні - Тұңғыш Президенттің еліне, халқына сіңірген өлшеусіз еңбегі.
Кітап «Тұңғыш Президент - Елбасы туралы», Елбасы және Қызылжар», Бірлігі жарасқан бақытты елміз» атты үш негізгі бөлімнен тұрады.
«Шыққан биігіміз еңселі десек, алдымыздан жаңа көкжиектердің ашылуы ертеңіміздің бүгінгіден де нұрлы болатынына сендіреді. Жүріп өткен жолымыз да соған айғақ. Күні кеше ғана тәуелсіздіктің тәуекелге толы жолын таңдап, нарыққа енгенде жұртпен бірге етекте тұрсақ, бүгін, міне, еңсеміз тіктеліп, дамыған елдердің өздерімен иық теңестіре алатын деңгейге көтерілдік. Қазір біздің әлеуметтік-экономикалық өсім деңгейі жоғары қарқынмен дамып келе жатқан, мемлекеттік және қоғамдық негіздері бері қалыптасқан, нарықтық экономикаға батыл қадамдар жасаған ел екенімізді бүкіл әлем мойындап отыр»,- дейді осы кітап-альбомды құрастырған ҚР Парламенті Мәжілісінің депутаты, жазушы Жарасбай Сүлейменов.
Солтүстікқазақстандықтардың пікірі: «Елбасының сан қырлы қызметінің халқымыздың сана-сезімінде сілкініс туғызғанын, ұлттың рухын жаңа сапалық деңгейге көтергенін айту - зор ғанибет. Президенттің ел игілігі, халық бақыты жолында бүгін тындырып жатқан істері бір ғасырдың шеңберіне сыймайды, ол қазақ елімен бірге мәңгі жасай береді. Біз оны мақтаныш етеміз» деген оймен түйінделген.
13 баспа табақтан тұратын көлемді бұл жинақ екі мың таралыммен шығып отыр.