Елбасы Жолдауына сәйкес Орал қаласының әділет басқармасы халыққа қызмет көрсету сапасын жақсарта бермек - Л.Орманова, басқарма бастығы

ОРАЛ. 1 наурыз. ҚазАқпарат - Елбасының халыққа арнаған «Әлеуметтік-экономикалық жаңғырту - Қазақстан дамуының басты бағыты» атты Жолдауы тәуелсіздігіміздің үшінші онжылдығында ел дамуының басты ұстанымдары нақты көрсетілген.

Жолдауда халыққа мем­лекеттік қызмет көр­се­тудің сапасын арттыру міндеті қойылып отыр. Елбасы атап көр­сеткеніндей, «Бұл сыбайлас жемқорлыққа қарсы тұру мен азаматтардың мемлекеттік органдардың қызметіне сенімді арттырудың маңызды қыры» екені сөзсіз. Орал қаласының әділет басқармасы халыққа қыз­мет көрсетудің сапасына үнемі көңіл бөліп келеді. Бұл туралы басқарма бастығы Ләззат Орманова мәлім етті.

Оның айтуынша, бүгінде жыл­жымайтын мүлікке құқықты мем­лекеттік тіркеу, заңды тұл­ға­ларды тіркеу қызметтері біздің бас­қарма құзырына берілді. Сонымен қатар аталмыш басқарма бұрыннан азаматтық хал актілерін тіркеу (АХАТ) бөлімімен көрсетілетін дүниеге келген сә­биге туу куәлігін және қайтыс болған жанның отбасына осы жағдай жөніндегі анықтама бе­ру, неке қию, некені бұзу, әкелікті анықтау, бала асырап алу, аты-жөнін өзгерту жөніндегі қызметтерді де атқарады.

Елбасы электронды үкіметті дамытуға мән беріп, 2012 жыл­дың аяғына дейін әлеуметтік ма­ңызы бар мемлекеттік қыз­мет­тердің 60 пайызы, соның ішінде лицензиялардың барлық түрлері тек қана электронды түрде болуы керектігі жөнінде тапсырма берді. Ал 2013 жылдан бастап мемлекеттен бар­лық рұқсат етушілік құжаттарды
да қазақстандықтар электронды түр­де немесе халыққа қызмет көрсету орталықтары арқылы алмақ. Соған орай бүгінде қа­лалық әділет басқармасымен некеге отыру және некені бұзу қызметтеріне қатысты азамат­тардың өтініштері электронды түрде алынады. Бұл үшін азаматтар халыққа қызмет көрсе­ту орталығынан электрондық сан­­дық қолтаңба алулары керек. Мұның өзі тұрғындардың ақ­параттық технологияларды меңге­руіне түрткі болатыны анық.

«Елбасы Жолдауынан туындайтын міндеттерді орындауда қалалық әділет басқармасының ұжымы да ұйымшылдықпен қыз­мет етіп, халықтың көңілінен шығуға ұдайы ұмтылмақ», деп түйіндеді ойын Л.Орманова.