Электрондық ақшаға қатысты заң жобасы үшінші оқылымда мақұлданды - Мәжіліс
Естеріңізге сала кетейік, аталған заң жобасы елімізде электронды ақшаны шығару әрі пайдалану үшін құқықтық негіз қалыптастыру болып табылады. Сондай-ақ, электрондық ақша шығару және онымен төлемдерді, өзге де қаржы операцияларын жүзеге асыру үшін оларды пайдалану саласында қалыптасып отырған құқықтық қатынастарды реттеу көзделеді. Мамандардың айтуынша, бұндай электрондық ақша жаңадан енгізілетін дүние емес, өйткені осындай электрондық ақша Қазақстанда айналымда бар. Дегенмен, бұндай ақша елімізде резидент еместер тарапынан шығарылады және бұлардың бәрі шетелдік валюта түрінде болып отыр. Сондықтан да заң жобасы жүзеге асса, қазақстандық банктер ұлттық валюта, яғни теңге бойынша электрондық ақша шығара бастайды. Өз кезегінде интернет пайдаланушылар желілерді пайдалана отырып, он-лайндық сатып алулар жасай алады. Тоқтала кететін жайт, электрондық ақшаны иелену әрбір интернет пайдаланушы жеке тұлғалардың таңдауы арқылы жүзеге асады. Сонымен бірге, бүгінгі күні еліміздегі электрондық коммерция саласында отандық электрондық ақшаның болмауы салдарынан қаражаттың сыртқа ағылу жағдайы да кездескен. Отандық банктердің электрондық ақша шығара бастауы одан кейінгі кезеңдерде елімізде қажетті инфрақұрылымдарды құруға негіз болады. Сондықтан да, заң жобасын қабылдау нәтижесінде елімізде интернет-сауда жандана түседі деп күтілуде.
Үшінші оқылымға әзірлеу барысында депутаттар тарапынан нақтылау сипатындағы өзгеріс енгізілген. Мәжіліспен үш оқылым бойынша мақұлдаған заң жобасы Парламент Сенатына жіберіледі.