Елордада «Astana Invest 2015» халықаралық инвестициялық форумы басталды (ФОТО, ВИДЕО)

АСТАНА. ҚазАқпарат - Астанада Тәуелсіздік сарайында «Astana Invest 2015» VI Халықаралық инвестициялық форумы басталды. Форумның биылғы тақырыбы ретінде Қазақстан мен Астананың инвестициялық мүмкіндіктері талқыланады.

Форумның мақсаты - Астана қаласының әкімшілігі мен Қазақстандағы негізгі инвесторлар арасында диалог алаңын орнату. Форум тарихында алғаш рет «Қазақстандық-әмірлік бизнес форумы» ұйымдастырылып отыр. Сонымен қатар форум аясында «Астанада жасалған», «Smart Астана», «Астана EXPO-2017» және «Қаладағы қазіргі көлік» атты көрмелер өтіп жатыр. Форум жұмысына әлемнің отыз елінен 3 мыңнан астам делегат қатысуда. Олардың арасында әлемге әйгілі миллиардер Джим Роджерс, «fDi» журналының бас редакторы Кортни Фингар, жаһандық бәсекеге қабілеттілік индексінің авторы Ксавьер Сала-и-Мартин қатысуда. Айта кетер жайт, «fDi» журналының бас редакторы Еркін экономикалық аймағы бар қалалар рейтингінде Астана қаласына осы рейтингтің 20-шы орнын алғандығы туралы сертификат табыс етеді. Форумның басты нәтижесі ретінде Қазақстан компаниялары мен шет елдік компаниялар арасында жалпы құны 1,99 млрд доллар көлеміндегі меморандумдарға қол қойылады деп жоспарлануда.