Фархад Харки - Универсиада жеңімпазы

АСТАНА. 9 шілде. ҚазАқпарат - Қазақстандық зілтемірші Фархад Харки Қазан қаласында өтіп жатқан Универсиадада 62 келіге дейінгі салмақ дәрежесінде алтын еншіледі.

Жерлесіміз жалпы есеп бойынша 306 (135+171) келіні бағындырып, жұлқа көтеруден Универсиаданың жаңа рекордын орнатты. Оның басты қарсыласы солтүстіккореялық Ча Кум Чол 306 (140+166) келіні көтеріп, күміс медальді қанағат тұтты. Үштікті 294 (131+163) келімен жапондық Йоичи Итоказу түйіндеді.

Бұған дейін белбеумен күресте Димаш Молдашев (75 келі) күмісті, Аян Ермекбаев (82 келі) және Гүлнұр Ерболова (52 келі) қола медальді жеңіп алған болатын.