Грузияда 2013-2020 жылдарға арналған кәсіптік білім беруді дамытудың мемлекеттік стратегиясы жасалды

АЛМАТЫ. 19 сәуір. ҚазАқпарат - 4,5 млн. халқы бар Грузияда 82 кәсіптік білім беру ұйымы бар. Бұл туралы Грузияның жекеменшік колледждер қауымдастығының президенті, Грузия бизнес академиясының (SBA) ректоры Кахабер Ерадзе Алматыда өткен «Жекеменшік білім беру ұйымдарының экономиканы дамытудағы рөлі» деп аталатын халықаралық конференция кезінде айтты.

«Грузияда кәсіптік білім реформасы 2009 жылы кәсіптік білім туралы заң қабылданғаннан кейін басталды. Оған дейін кәсіптік білімді негізінен қоғамдық білім беру мекемелері жүзеге асырып келген еді. Қазіргі таңда оның үлесі 16 пайызды, ал жекеменшік білім беру мекемелерінің үлесі 84 пайызды құрайды», - дейді экономика ғылымдарының докторы Кахабер Ерадзе.

Оның айтуынша, кәсіптік білім беруді дамытуға кәсіптік және жоғары білім беру мекемелері студенттерінің әлеуметтік мәртебесінің теңестірілмеуі өз ықпалын тигізуде. Мәселен, кәсіптік білім беру мекемелерінде оқитын студенттер қоғамдық көлікте тегін жүру, сақтандыру сияқты әлеуметтік жеңілдіктерді пайдалана алмайды. Сондықтан жекеменшік колледждер қауымдастығы бірнеше заңдар мен оның аясындағы заң актілері жобасына бастамашы болды. Сондай-ақ оның белсенді қатысуымен 2013-2020 жылдарға арналған кәсіптік білім беруді дамытудың мемлекеттік стратегиясы жасалды.