Халық банкі отандық экспорттаушы кәсіпорындарға қаржылық көмек көрсету жобаларының саны бойынша жетекші орында тұр

АЛМАТЫ. Қыркүйектің 8-і. ҚазАқпарат /Ерлік Ержанұлы/ - Отандық тауар өндірушілерге қолдау жасауға бағытталған мемлекеттік іс-шаралар қолға алынғаннан бері Халық банкі өз клиенттерінен келіп түскен жалпы сомасы 34 миллиард 441 миллион теңгеден асатын 65 өтінімді қарастырды,

деп хабарлайды ҚазАқпарат банктің баспасөз қызметіне сілтеме жасап.

«Бизнестің жол картасы - 2020» мемлекеттік бағдарламасын жүзеге асыруға белсенді түрде атсалысып жатқан банкке келіп түскен өтінімдердің субсидиялау қажет етілетін заемдар сомасы шамамен 1,4 миллиард теңгені құрады. Бағдарламаны жүзеге асыру негізінен үш бағытта жүргізіледі: жаңа бизнес-бастамаларына қолдау жасау, кәсіпкерлік саласын сауықтыру, экспортқа бағдарланған өндіріске көмек көрсету. Бүгінгі күні Халық банкі отандық экспорттаушы кәсіпорындарға қаржылық көмек көрсету жобаларының саны бойынша жетекші орында тұр (барлығы - 9 жоба). Мемлекет ағымдағы жылы осы Бағдарлама шеңберінде екінші деңгейлі банктер арқылы субсидиялау жүргізу үшін 30 миллиард теңгені игеруді жоспарлап отыр.