Халықаралық ғарыш стансысының ғарышкерлері Қазақ жеріне қонды

АСТАНА. 16 наурыз. ҚазАқпарат - "Союз ТМА-06М" басқарылатын ғарыш кемесінің жерге қонушы аппараты Қазақстанға, болжанған ауданға таяу жерге сәтті қонды,

деп хабарлады Ресей жаңалықтар агенттігі.

Халықаралық ғарыш стансысынан оралған кемеде Ресғарыш ғарышкерлері Олег Новицкий мен Евгений Тарелкин, сондай-ақ НАСА астронавты Кевин Форд бар.

Мәскеу түбіндегі Ұшуларды басқару орталығы коментаторының айтуынша, экипаж жайлы қонды. Төменге құлдилаған «Союз» аппаратының қонуын Ресавиациясының үш ұшағы, «Ми-8» 14 тікұшағы және 8 іздеу-қауіпсіз жерге көшіру машинасы қамтамасыз еткен. Бірнеше уақыттардан кейін ғарыш саяхатшылары капсуладан шығарылады.

Естеріңізге сала кетейік, бастапқыда ғарышкерлердің Жерге оралуы наурыздың 14-нен 15-ні қараған түнге жоспарланған еді. Дегенмен, Қазақстанда, «Союз» аппараты қонуы тиіс ауданда ауа райының қолайсыз болуына байланысты бір тәулікке кейінге шегерілді.

Халықаралық ғарыш стансысына жаңа экипаж наурыздың 28-інен 29-ына қараған түнде Байқоңыр ғарыш айлағынан «Союз ТМА-08М» кемесімен жөнелтіледі. Экипаж құрамында Ресғарыш ғарышкерлері Павел Виноградов пен Александр Мисуркин, сонымен қатар НАСА астронавты Кристофер Кэссиди бар.