«Халықтық IPO» аясында брокерлік есеп-шоттар тегін ашылды

АСТАНА. 26 сәуір. ҚазАқпарат - Бүгін «Нұр Отан» Халықтық демократиялық партиясының Қоғамдық қабылдау бөлімінің ұйымдастыруымен «Халықтық IPO» бағдарламасын түсіндіру жұмыстары өтті. Партия өкілдері «Астана-энергия» АҚ-да болып, кәсіпорын қызметкерлеріне акцияларды сатып алу туралы жан-жақты айтып берді.

Бүгін осы іспетті шара пратияның барлық бөлімшелерінде өтті. Оның аясында ел азаматтары «Халықтық IPO» бағдарламасы туралы қажетті ақпаратты алып қана қоймай, Қазпоштаның кез келген бөлімшесінде брокерлік есеп-шотты тегін аша алады. «Халықпен жұмыс жасаудың бұндай шаралары Қазақстанның барлық аймақтарында өткізіледі. Бүгін де қала тұрғындары ғана емес, шалғай жерде тұратын ауыл адамдары да «Халықтық IPO» бағдарламасымен жан-жақты танысуға мүмкіндік алды», - дейді «Нұр Отан» Халықтық демократиялық партиясының Қоғамдық қабылдау бөлімінің меңгерушісі Жұмажан Жүкенов.