Игорь Нанаевтың ісі бойынша тағы үш күдікті ұсталды
Берік Біләлов спортшыны соққыға жықты деген күдікпен тағы үш адам ұсталғаны жайлы хабарлады.
«3 қазанда 3 сағат 49 минутта Петропавл қалалық ІІБ кезекшілік бөліміне жедел жәрдем орталығынан «Парк Сити» мәдени-сауықтыру кешеніне бригада шыққаны туралы хабар түсті. Сотқа дейінгі тергеу кезінде күдікті - 21 жастағы облыс орталығының тұрғыны ұсталып, Петропавл қалалық ІІБ уақытша ұстау оқшаулағышына қамалды. 3 қазанда «Парк Сити» ойын-сауық кешенінің маңында күдікті мен Игорь Нанаев төбелескені анықталды. Кешенді жедел-іздестіру шаралары жасалып, жаңа мәліметтер алынды. Аталған қылмысты жасады деген күдікпен ІІБ уақытша ұстау оқшаулағышына 1994,1995, 1996 жылы туған азаматтар қамауға алынды», - деді полиция ведомствосының басшысы.
Бұл СҚМУ-дың екі студенті мен Петропавлдағы колледждерінің бірінің шәкірті болып шықты. Полиция қылмысқа тағы да бірнеше адам қатысты болуы мүмкін дейді.
Берік Біләлов ҚР ҚК 106-бабы 3-бөлімі бойынша қозғалған қылмыстық іс аясында тиісті сараптамалар тағайындалғанын, 80-нен астам адам жауапқа алынғанын, ойын-сауық мекемесінің камераларына іліккен видеоматериалдар зерттелгенін атап өтті.
Тергеу амалдарының жүргізілу барысы Бас прокуратура мен Ішкі істер министрлігінің бақылауына алынды.