Қарағанды әуежайында «Союз ТМА-18» ғарыш кемесінің экипажын қарсы алу рәсімі өткізілді
Орбитадан қайтып оралған ғарышкерлерді Қарағанды қаласының әкімі Бауыржан Әбдішев, Ресей Федерациясының әуе көлігі Федералдық агенттігі басшысының төрағасы Александр Ведерник пен Қазақстандағы РФ Елшілігінің кеңесші-елшісі Владимир Спринчан қарсы алды.
«Ертеден Сарыарқаның Қарағанды жері ғарышкерлерді қарсы алу мәртебесіне ие болуда. Бұл кездесу біз үшін - кезекті атаулы оқиға», - деді Қарағанды қаласының әкімі.
А.Ведерник экипаж мүшелеріне өз алғысын жеткізді. «Сіздер жарты жылдай уақыт орбитада болдыңыздар. Сіздер тапсырылған бағдарламаны ойдағыдай орындадыңыздар. Сіздер адамзаттың ғарыш кеңістігін бағындырудағы тағы бір қадамын жасадыңыздар», - деп атап өткен ол, ғарышкерлерді жерде тезірек оңалтудан өтуге тілек білдірді.
Экипаж мүшелері өз кезегінде ұшу мен қону кезінде көмектескендердің барлығына шынайы алғыстарын жеткізді. «Бізді Қазақстан жері жылы ауа-райымен қарсы алып отырғанына қуаныштымыз. Ол орбитадан қарағанда тамаша көрінеді. Адамдардың қонақжайлығы сезіледі. Біз шынында да Жерді сағындық», - деп атап өтті Александр Скворцов.