Қармақшы ауданында тұрмысы төмен отбасылардың балаларына жәрдем жасалды - Қызылорда облысы
Жосалы кентінде ұйымдастырылған шара барысында мемлекеттік мекемелер мен жеке кәсіпкерлер, шаруашылықтардың демеушілігі нәтижесінде 100-ге жуық балаға түрлі тарту-таралғылар табысталды. Бұған «Қызыл Ай» қоғамының облыстық бөлімшесі тарапынан 13 оқушыға 550 мың теңге көлеміндегі қаржылық көмек көрсетілді. Аудан әкімінің қолдауымен өткізілген акция алыс ауылдар мен шалғай елді мекендерде жарасымды жалғасып, жергілікті атқарушы билік өкілдерінің жомарттығы жұртшылықты риза етті.
Ғарыш қақпасы атанған құтты қоныстағы клубта «Жиһаз» сауда дүкенінің иесі Эльмира Уталиева, «Фудмастер» компаниясының дистрибютері Динара Отарбаева, жеке кәсіпкер Мырзадәулет Есжанов және «Космос» колледжінің директоры Әнуар Дәуленбаев әлеуметтік тұрғыдан қорғалуы тиіс 12 оқушыға жаңа оқу жылының қарсаңында арнайы әзірленген сыйлықтарын таратты.