«ҚазАқпарат» Қазақстанның халықаралық имиджін қалыптастырады - А.Бекбосын

ТАРАЗ. ҚазАқпарат - Алғашқы қазақстандық жаңалықтар агенттігі елдің тамыр соғысын қолында ұстап келе жатқанына жүз жылға жақын уақыт болды, деді агенттік тілшісімен әңгімелесу барысында жамбылдық журналистика ардагері, қоғам қайраткері, жазушы, XIII шақырылымдағы (соңғы) ҚазКСР Жоғары кеңесінің депутаты, ҚР Парламенті Мәжілісінің бұрынғы депутаты Арғынбай Бекбосын.

«Әріптестерімді 95 жылдық мерейтойымен құттықтаймын. Осы жылдар ішінде атауы талай өзгерсе де, оның қызметкерлері талай қиындықтарды бастан өткерсе де, агенттік материалдарының жеделдігі, нақтылығы, ұстамы еш өзгерген жоқ. Журналистердің кәсібилігі артпаса, кеміген жоқ. Әр жылдары агенттікті басқарған басшылар құрметке лайық, есімдері отандық журналистика тарихында мәңгі қалатын жандар».

Сұхбаттасушының пікірінше, «ҚазАқпарат» ХАА Қазақстан мен әлем өңірлерінің әлеуметтік-экономикалық және қоғамдық-саяси өмірінің негізгі оқиғаларының барлығын толықтай қамтиды. «ҚазАқпарат лентасын қарап шықсаңыз өмірдің шынайы шежіресін тамашалағандай әсерде боласың, барлық саяси өзгерістер, әлеуметтік реформалар, ауқымды құрылыстар, өзекті мәселелер, ғылыми, мәдени, спорттық жетістіктер - осының барлығын ҚазАқпарат жедел, қысқа әрі нұсқа жеткізеді», - деді Бекбосын.