Қазақстандағы мемлекеттік қызмет реформаларын қолдау Еуроодақ үшін басым бағыт - ЕО өкілі А.Бушез

АСТАНА. 18 сәуір. ҚазАқпарат - Қазақстанда жүзеге асып жатқан мемлекеттік қызмет жүйесін реформалауға қолдау көрсету Еуроодақ үшін ынтымақтастықтың басым бағытына айналып отыр. Бұл туралы бүгін Астанада «Мемлекеттік қызметті реформалау: ішкі көзқарас және БАҚ-тағы көрініс» атты семинарда Еуропалық Одақ өкілдігінің басшысы Аурелия Бушез мәлім етті.

«Еуропалық Одақ Қазақстанның ұзақмерзімді әріптесі болып табылады: Біз биыл Еуроодақ пен Қазақстан арасындағы дипломатиялық қатынастар орнауының 20-жылдығын атап өткен болатынбыз. Осы жылдар ішінде біз Қазақстанға техникалық көмектер көрсетіп, сараптамалар жасауда жәрдемдестік, тәжірибе алмасып, көптеген секторлар бойынша мығым әріптестерге айналдық. Осылайша, 20-жылдық ынтымақтастықтың нәтижесінде Еуроодақ үшін Қазақстанның мемлекеттік қызмет секторын реформалауға қолдау көрсету ынтымақтастықтың басым бағытына айналды. Осы бағытқа Еуропалық Одақпен 10 млн. еуро бөлінген болатын», - деді А.Бушез.

Оның айтуынша, Еуроодақ тиімділікке, заманауи корпоративтік басқару қағидаттарына негізделген, сондай-ақ қоғам алдында ашық әрі есеп бере жұмыс істейтін мемлекеттік қызметті дамытуды жан-жақты қолдайды.