Қазақстанның мәдениет жылын Үндістанда өткізу жоспарланып отыр - Елбасы

АСТАНА. 16 сәуір. ҚазАқпарат /Руслан Ғаббасов/ - Қазақстанның мәдениет жылын Үндістанда өткізу жоспарланып отыр. Бұл туралы бүгін Ақордада Үндістанның Премьер-Министрі Манмохан Сингхтің ресми сапары аясындағы кеңейтілген келіссөздер барысында Елбасы Нұрсұлтан Назарбаев мәлім етті.

«Біз үкіметаралық комиссияның жұмысын жандандыруды және бірлескен бизнес жобалар жұмыстарын жүргізуді келістік. Сондай-ақ біздің мемлекеттерді жақындастыру мақсатында Қазақстан мәдениеті жылын Үндістанда, ал Үндістан мәдениеті жылын Қазақстанда өткізуді уағдаластық», - деді Елбасы.

Мұнымен қоса Мемлекет басшысы парламентаралық, жастарға білім беру, техникалық даму, сондай-ақ Қазақстанды индустрияландыруды Үндістан компанияларының қатысуы тұрғысындағы ынтымақтастықты дамыту мәселесі сөз болғанын жеткізді.

«Осы мәселелер бойынша тараптарда бірыңғай пікір қалыптасып отыр», - деді Н.Назарбаев.

Сөз соңында Президент Үндістан Қазақстан үшін ынтымақтастық тұрғысында сенімді әрі маңызды әріптес ел екенін айтып өтті.