«ҚазТрансГаз Аймақ» АҚ-ның жылдық ақша түсімінің көлемі 2011 жылы 60 пайызға ұлғайды

АЛМАТЫ. 28 ақпан. ҚазАқпарат - «ҚазТрансГаз Аймақ» АҚ  барлық негізгі көрсеткіштер бойынша  2011 жылды сәтті аяқтады. Бұл туралы бүгін жарияланған    қаржылық-шаруашылық қызметінің қорытындыларында мәлім болды.   

Компанияның баспасөз қызметінің хабарлауынша, 2011 жылы  газды сату көлемі 7 млрд. 664 млн. текше метрді құрады. Бұл  2010 жылғы көрсеткіштен 57 пайызға жоғары.   Газды тасымалдау көлемі 10 пайызға ұлғайып, 5 млрд. 188 млн. текше метр болды.  Газ тарату құбырларының ұзындығы 8 159 шақырымға ұзарып, 18 949 шақырымға жетті.  Бұл газ тарту құбырларын жергілікті әкімдіктердің коммуналдық меншігінен компания меншігіне  беру жөніндегі Үкіметтің 2010 жылғы   14 қыркүйектегі  № 939 қаулысын жүзеге асыру арқасында мүмкін болды. Соның  нәтижесінде  күрделі қаржы жұмсалымы былтыр алдыңғы  жылға қарағанда 1,56 есеге өсіп,  7 млрд. 995 млн. теңгені құрады. Оның 5 млрд. 450 млн. теңгесі инвестициялық жобаларға жұмсалды. Акционерлік қоғам ел  бюджетіне 6 млрд. 265 млн. теңге көлемінде салық пен өзге де міндетті төлемдер құйды.  Ал жылдық ақша түсімінің көлемі 83 млрд. теңгеге дейін өсті. Бұл 2010 жылға қарағанда, 60 пайызға артық.